ရှာပုံတော်ကြီးများ

Issue - 50

နဖူးတော်််််ပေါ် လက်တော်ကြီးတင်ပြီး အိပ်လို့မပျော် မျက်နှာကျက်ကြီးကိုကြည့်နေပြီး “ငါ့ဘဝကဘာလဲ” “ငါလိုချင်တာဘာလဲ” “ငါဖြစ်ချင်တာဘာလဲ” “ငါဘာတွေတော်လဲ” “ငါဘာတွေတတ်သလဲ” မေးကြည့်ဖူးတဲ့အချိန်တွေရှိသလား? ကျနော်တော့ရှိခဲ့ဖူးတယ်။ ကိုယ့်ကိုယ်ကို ပျောက်နေတဲ့အချိန်တွေဆိုပါတော့။ ငါ့ဘဝရဲ့ အဓိပ္ပါယ်ဆိုတာဘာလဲလို့မေးခွန်းတွေထုတ်ရင်း အချိန်ကုန်နေခဲ့ရတဲ့အချိန်တွေလဲရှိတယ်။ ကိုယ့်ကိုယ်ကိုပြန်ရှာရတယ် ဘာဖြစ်ချင်တယ် ဘာလုပ်ချင်တယ် ဘာတွေတော်တယ် ဘာတွေတတ်တယ်ဆိုတာသိအောင်လုပ်ရတယ်။ အဲ့အတွက် အချိန်ဆိုတာလဲပေးရတယ် ဒါကို ရှာပုံတော်ဖွင့်ခန်းလို့ခေါ်ရမယ်။ ဒါကြောင့် ဒီနေ့ newsletter ကို ရှာပုံတော်ကြီးများလို့ခေါင်းစဉ်တပ်ထားတာပေါ့ဗျာ။

ကျနော်ကိုယ်တိုင်လဲ ဘာဝါသနာပါမှန်းသေချာမသိခဲ့လို့ မိဘလက်အောက်မှာ ပြောတာလုပ် ပြောသလိုနေ သေဆိုသေ ရှင်ဆိုရှင်နေခဲ့ရတဲ့အချိန်တွေရှိတယ်။ စိတ်ပါလှတယ်တော့မဟုတ်ပေမယ့် ဘယ်အလုပ်ကိုမှ ပြီးပြီးရောမလုပ်တတ်တဲ့ကျနော်က မသိရင် ဝါသနာပါလို့လုပ်နေတယ်လို့ထင်ရလောက်အောင် အလုပ်ကြိုးစားတယ်။ တကယ်တော့မပျော်နေဘူး။ ၁၀ တန်းပြီးတော့ အလုပ်သင်အနေနဲ့ corporate ထဲကိုဝင်လုပ်ခဲ့ဖူးတယ် ၁ နှစ်ခွဲလောက်။ office politic တွေနဲ့ ကျနော်လို့တဲ့တိုးအိုးပေါက်ပြောတတ်ပုံနဲ့ အဆင်မပြေဘူး။ အလုပ်ထွက်ပြီး ကျောင်းပြန်တက်တယ် အလုပ်မှာလူကြီးတွေနဲ့နေလာတာများတော့ ကျောင်းမှာ ရွယ်တူကလေးတွေလို ကလေကချေလိုပြန်နေဖို့ကျတော့လဲ fit in မဖြစ်တော့ပြန်ဘူး။ အဖေက ဖုန်းဆိုင်လုပ်တော့ Apple Device နဲ့ပက်သက်တာတွေကို တာဝန်ယူ ဝန်ဆောင်မှုရော သင်တန်းရောပေးတော့လဲ ဒါတွေကြီးပဲ ထပ်ခါထပ်ခါ လုပ်ရတာ အဆင်မပြေတဲ့အပြင် ပျင်းလာတယ်။ အစကတော့ပျော်ပါသေးတယ် မတူတဲ့ ပြဿနာတွေရှင်းရလို့ ကြာလာတော့ ပြင်ရတဲ့ ပြဿနာတွေက တူလာတော့ ပျင်းပါလာတယ်။ ဖြစ်စေချင်လို့ ဖိအားပေးတဲ့ အဖေနဲ့ မလုပ်ချင်ရင် စိတ်မပါရင် အရွဲ့တိုက်တဲ့ကျနော်နဲ့ ရန်ဖြစ်စကားများတော့ အဲ့ career ကြီးကို အပြီးတိုင်စွန့်လွှတ်လိုက်တယ်။

အဲ့မှာသေချာသိလိုက်တာက ကျနော်ကိုပျော်ရွှင်စေတာ နည်းပညာနဲ့ပက်သက်တဲ့အလုပ်ဆိုတာရယ် ချုပ်နှောင်ခံရတာ ထပ်ခါထပ်ခါလုပ်ရတာတွေကို မကြိုက်ဘူးဆိုတာရယ် ဇွဲရှိရှိလုပ်တတ်တယ်ဆိုတာရယ်ကောင်းကောင်းသိခဲ့တယ်။ ဒီလိုကိုယ့်ကိုယ်ကို ပြန်ရှာတွေ့ဖို့ဆိုတာ ဘာမှမလုပ်ဘူးပဲနဲတော့ရှာမရဘူးဆိုတဲ့အချက် ကတော့ အသေအချာပဲဗျ။ ဘာမှမလုပ်ဘူးပဲနဲ့ ငါဘာကြိုက်လဲ ဘာလိုချင်လဲ ဘာလုပ်ချင်လဲလို့တွေးနေတာဟာ ရည်းစားမထားဖူးတဲ့သူက အချစ်ဆိုတာဘာလဲထိုင်းစဉ်းစားနေတဲ့ FA တွေလိုဖြစ်နေမယ်။ ( SRY NOT SRY )

ကိုယ့်ကိုယ်ကို ရှာတော့မယ်ဆိုရင်

ရှာပုံတော် မင်းသား မင်းသမီး တွေရဲ့ခရီးက လွယ်လွယ်ကူကူတော့မဟုတ်နေနိုင်ဘူး။ တွေ့ကိုတွေ့မယ်လိုလဲ အာမ မခံနိုင်ဘူး။ ဘာလို့လဲဆိုတော့ မွေးထဲက ဝါသနာမရှိတဲ့သူတွေ talent မပါတဲ့သူတွေ ဘာမှမလုပ်ချင်တဲ့သူတွေဆိုတာလဲရှိသေးတာကိုးဗျ။ အာမခံနိုင်တာတစ်ခုကတော့ ဒါက Advenuture တစ်ခုနဲ့တူတယ်။ အချိုးအကွေ့တွေ အတက်အကျတွေ နဲ့ပြည့်စုံနေမှာမို့ စိတ်လှုပ်ရှားဖို့ကောင်းတယ်ဆိုတာ အသေအချာပါပဲ။

စိတ်အတွင်းပိုင်းကိုစစ်ပါ

ကိုယ့်ကိုယ်လိမ်နေတာတွေ ဘေးပတ်ဝန်းကျင်ရဲ့ ပရောဂတွေ အပေါင်းအသင်းတွေမိဘတွေ ချစ်ရသူတွေရဲ့ ဖိအားတွေ အကြံပေးမှုတွေကို ခဏ ဘေးချိတ်ထားပြီးတော့

• ကိုယ်ကဘာတွေကိုတန်ဖိုးထားတာလဲ

• ကိုယ်က ဘယ်နေရာတွေမှာတကယ်တော်တာလဲ

• ဘယ်နေရာတွေမှာ ဘယ်လိုကြိုးစားကြိုးစားမရနိုင်တာလဲ

• ဘယ်အရာတွေကိုလုပ်နေရရင် အားတက်စေပြီး

• ဘယ်အရာတွေကိုလုပ်နေရရင် စိတ်ပျက်စေသလဲ

ဒါတွေကိုအချိန်ပေးပြီးတော့ ကိုယ့်ရဲ့ pattern တွေကိုနားလည်တဲ့ထိ စစ်ဆေးကြည့်ရမယ်။

ပုစ္ဆာတစ်ပုဒ်လိုရှင်းပါ

ကိုယ့်ကိုယ်ကိုသိဖို့ဆိုတာ ခက်တဲ့ ပုစ္ဆာတစ်ပုဒ်ပဲမို့ သင်္ချာတွက်ရင် ၂+၂ ကတော့ စိတ်တွက် တွက်လို့ရမယ် (၂၄၃၇ x ၄၅၀ ) + ၃၄ x 67 ကိုတွက်တော့မယ်ဆိုရင်တော့ စာရွက်ပေါ်ချရေးပြီးတွက်ရင်ရှင်းသွားမယ်မလား? အဲ့လိုပဲ ကျနော်တို့ရဲ့စိတ်အတွင်းထဲမှာတကယ်ရှိတဲ့ အိမ်မက်တွေ၊ အကြောက်တရားတွေ ၊ စိတ်ဝင်စားတဲ့အရာတွေကိုရေးချဖို့လိုတယ်။ ဘိုလိုခေါ် journaling ပေါ့။ ကျနော်ကတော့ ဒါကို စိတ်ပုစ္ဆာရှင်းတယ်လို့ပဲမြင်တယ်။ ဘယ်ကစပြီးရေးရမလဲမသိရင် ကျနော် prompt နဲနဲပေးပေးမယ်။

• ဘယ်အရာတွေလုပ်နေရရင် ငါအချိန်တွေကုန်မှန်းမသိကုန်သွားပြီး လုပ်ပြီးသွားရင် ကျေနပ်အားရမှု အောင်မြင်မှုလို့ခံစားရလဲ?

• ပိုက်ဆံဘယ်လောက်ပဲပေးပေး ငါဘယ်တော့မှမလုပ်ဘူးဆိုအရာတွေက ဘာတွေလဲ ? ဘာကြောင့်မို့မလုပ်တာလဲ? ငါဘာတွေကိုတန်ဖိုးထားလို့လဲ?

• သူများတွေအတွက် ခက်ခဲပြီး ငါ့အတွက်ဆို လွယ်နေတဲ့အရာတွေက ဘယ်လိုအရာတွေလဲ ?

• ငါလုပ်မကြည့်ရသေးပဲနဲ့ မကောင်းဘူး မဖြစ်နိုင်ဘူးဆိုပြီး ကြောက်နေတဲ့အရာတွေက ဘယ်အရာတွေလဲ ?

ချစ်ရသူတွေကိုမေးပါ

ပုလင်းထဲမှာထည့်ခံထားရရင် ပုလင်းအပြင်က ရေးထားတဲ့စာတွေကိုကိုယ်တိုင်ဖတ်လို့မရသလိုပဲ ကျနော်တို့ ကိုယ့်ကိုယ်ကိုသေချာမသိတဲ့အရာတွေဆိုတာလဲရှိတယ်ဗျ။ ဒီလိုအခါမျိုးမှာ ကျနော်တို့ရဲ့ မိသားစုတွေ၊ မိတ်ဆွေသူငယ်ချင်းတွေ၊ လုပ်ဖော်ကိုင်ဖက်တွေ၊ ဘဝလက်တွဲဖော်တွေ ကိုမေးကြည့်တာအကောင်းဆုံးပဲ။ $ပိုတွေပြောတာမျိုးမဟုတ်ပဲ တကယ်ကို မကောင်းတာတွေရော ကောင်းတာတွေကိုပါ သေချာ ပြောပေးမယ့် သူတွေဖြစ်ဖို့တော့လိုတယ်။ အမေကိုမေးရင်တော့ သားသမီးတိုင်းကချောတယ်ပဲအဖြေရမှာ ဒါပေမယ့် အမြဲမမှန်နေဘူးလေ။ :D

ဒါကြောင့်မှန်ကန်တဲ့အဖြေရအောင် မေးတတ်ဖို့လိုတယ်။

• ဘယ်တစ်ခုကိုပြောင်းလဲလိုက်ရင် ငါက ဒီထက်ပိုတော်သွားနိုင်လဲ? လို့မေးတာက ငါ့မှာဘာအားနဲချက်ရှိလဲလို့မေးတာထက်ပိုကောင်းတယ်။

• ငါမှာ နင်အားကျရတဲ့အရာဘာရှိလဲ? လို့မေးတာက ငါဘာတွေတော်လဲလို့မေးတာထက်ပိုကောင်းတယ်။

• ငါ့ကိုတခြားသူတွေက ဘယ်လိုဆဲရင် ငါနာမလဲ? လို့မေးတာက နင်တို့မပြောရဲတဲ့ ငါ့ရဲ့အားနဲချက်က ဘာတွေလဲ လို့မေးတာထက်ပိုကောင်းတယ်။

ကိုယ့်အကြောင်းကိုယ်ပိုသိလာရင်

ကိုယ်ဘာတွေလိုချင်တယ် ဘာတွေဖြစ်ချင်တယ် ဘာတွေမလိုချင်ဘူး ဘာတွေမဖြစ်ချင်ဘူးဆိုတာသိလာပြီဆိုရင် ကိုယ်မလုပ်ပဲရှောင်နေတာတွေကိုစပြီးစမ်းသပ်လုပ်ဆောင်ကြည့်ဖို့လိုတယ်။ အရေးကြီးတာ ကိုယ့်ရဲ့ skill နဲ့ posibilitites တွေကိုချဲ့ဖို့ပဲဗျ။ မလုပ်ဖူးသေးတာတွေလုပ်ကြည့်မှ ကိုယ်မသိသေးတဲ့ ကိုယ့်အကြောင်းတွေကိုယ်သိလာမှာပါ။ ( မကောင်းတဲ့မလုပ်သင့်တဲ့ဟာတွေကိုပြောတာမဟုတ်ပါ )

ဆရာကောင်းရှာပါ

ဒီခေတ်မှာ ဆရာမရှားပါဘူး။ ဆရာများပါတယ်။ ကိုယ်လေးစားအားကျရတဲ့သူတွေကို mentor လုပ်ခိုင်းပါ။ လုပ်ပေးတဲ့သူကများပါတယ်။ အခကြေးငွေပေးပြီး mentor ထားရရင်ပိုတောင်ကောင်းပါတယ်။ မေးချင်တာတွေအတွက် အားနာစရာမလိုတော့ဘူးပေါ့။ mentor ရွေးတဲ့နေရာမှာတစ်ခုပဲသတိပြုပါ။ ကိုယ်ဖြစ်ခဲ့ဖူးသလိုဖြစ်ခဲ့ပြီး ကျော်လွန်သွားနိုင်တဲ့သူကိုရှာပါ။ သူဌေးသားကနေ သူဌေးဖြစ်လာတဲ့သူကို လောကဓံ လူ့မာယာတွေအကြောင်းသွားမေးလို့မရဘူး သူမသိနိုင်ဘူး။ လုပ်ငန်းမထောင်ဘူးတဲ့သူကို လုပ်ငန်းအထောင်တဲ့အကြောင်းသွားမေးလို့မရဘူး။ မဖြစ်မရှိတဲ့သူကို အဖြစ်ရှိတဲ့အကြောင်းသွားမေးလို့မရဘူး သူမသိဘူး။ ဒါကြောင့်ကိုယ်ရွေးတဲ့သူမှာ ကိုယ်လိုချင်တာလဲရှိပြီး ကိုယ်နဲ့တူတဲ့အနေအထားကိုကျော်ဖြတ်ဖူးသူဖြစ်မှ အကူအညီ အကြံဉာဏ်တောင်းရတာပိုကောင်းတယ်။

ဆရာဆိုတာပုံစံပေါင်းစုံနဲ့လဲ ဘဝထဲကိုရောက်လာနိုင်တယ်။ မိတ်ဆွေအနေနဲ့ဖြစ်ဖြစ် လုပ်ဖော်ကိုင်ဖတ်ဖြစ်ဖြစ် အထက်လူကြီးဖြစ်ဖြစ် online က creator ဖြစ်ဖြစ် ရောက်လာနိုင်တယ်။ အဲ့ထဲကနေ ကိုယ်တိုင် ကိုယ်နဲ့ ကီးကိုက်လောက်တဲ့သူတွေကိုရွေးပြီးဆရာတင်ပါ။

အချိန်ကောင်းဆိုတာအခုပဲ

ငါ့ကိုယ်ငါ သိဖို့အချိန်တန်ရင်သိမှာပါဆိုတာ တကယ်တော့မရှိဘူး။ အချိန်ကောင်းဆိုတာ အခုပဲ နောက်ကျသွားရင် လုပ်လို့မရတဲ့အရာတွေဆိုတာရှိတာမို့ ကိုယ့်အကြောင်းကိုယ်ပိုသိဖို့လုပ်မယ်ဆိုရင် အခုပဲစတင်ဖို့လိုတယ်။

မသိဘူးဆိုရင်

တကယ်လို့ ကိုယ့်မှာစိတ်ဝင်စားတာတစ်ခုမှမရှိ မွေးရာပါ အရည်အချင်းရယ်လဲ ဘာတစ်ခုမှမရှိဘူးဆိုရင် ကောင်းတယ်။ သင်ကအခု blank canvas လိုပဲ လိုရာပုံသွင်းဆေးချယ်လို့ရတယ်။ ကြိုက်ရာတစ်ခုကိုသာအမြန်ဆုံးရွေးလိုက်။ ရွေးတာနဲ့အချိန်ကုန်မခံနဲ့တော့။ စပြီးလုပ်ဖြစ်ဖို့ကြိုးစားတော့။ ရွေးရခက်တယ် လုပ်ချင်တာတွေကများနေတယ်ဆိုရင် မဲလိပ်လိပ်ပြီး ဘူးထဲထည့် သေချာခလောက်ပြီး တစ်ခုကိုရွေးပြီးစတင်လိုက်တော့။ ဒီတိုင်းကြီးနေနေလို့ဘာမှမထူးတာမို့ စတင်ဖြစ်ဖို့ကအရေးကြီးတယ်။ ရှာနေရင်းအချိန်ကုန်မခံနဲ့။ တစ်ခုခုလုပ်နေရင်းနဲ့ ရှာနေလို့လဲရတယ်။

လောကမှာအဆိုးဆုံးကတော့ ဘာမှမလုပ်ပဲ အချိန်တွေကုန်သွားတာပဲမို့ ဒီလိုမဖြစ်ဖို့သာကြိုးစာပါမိတ်ဆွေ။

သင်ရှာနေတဲ့သင့်ကိုယ်သင်လဲ အမြန်ဆုံးရှာတွေ့ဖို့ကျနော်ဆုမွန်ကောင်းတောင်းပါတယ်။

စေတနာများစွာဖြင့်

La Pyae

---

New YouTube Video This Week

self help စာအုပ်တွေအများကြီး ဖတ်ပြီးတော့ရလာတဲ့ အချက် ၁၀ ခုကို ပြန်လည်ပြောပြထားတဲ့ video လေးပါ။

---